Kombinimi i çokollatës dhe bananes është i prezentuar që nga “krem-bananet”, prandaj na duhej që të bëjmë një kombinim të tillë për të bërë desertin ideal.
Përbërësit e duhur:
Për teston (pandispanjen)
- 4 vezë
- 90 g sheqer
- 90 g miell + 10 g kakao në pluhur
- 100 g gjalpë të shkrirë
Për kremin (pjesa e parë)
- 60 g sheqer + 20 ml ujë
- 150 g gjalpë
- 200 g banane të coptuara
- 1 lugë rum (nuk është patjetër)
Për kremin (pjesa e dytë)
- 120 g pavllakë bime për shllagun
- 100 g pavllakë qumështi për shllagun
- 2 lugë zhelatinë të shkrirë në dy lugë qumësht
Për mbështjellësin e çokollatës
- 100 g pavllakë të qumështit për shllagun
- 150 g çokollatë e errët
Filloni me përgatitjen e shtresave duke miksuar vezët me sheqerin derisa të fitoni përzierje me shkumë, pastaj gradualisht i shtoni miellin e përzier me pluhurin e kakaos e pastaj përzieni të gjitha me lugë bashku.
Në fund, llokoçisni gjalpën e shkrirë dhe bashkojeni me brumin e testos. Vendoseni në enën e përzgjedhur dhe piqeni në furrë të ngrohur në 160 C për 40 minuta. Pasi të piqet pandispanja, prejeni horizontalisht në tre pjesë.
Për kremin e bananes hidhni ujë dhe sheqer në një tigan të vogël, vendoseni në shporet dhe lëreni sheqerin të shkrihet pa përzierje. Pasi shurupi të ketë marrë ngjyrë të artë shtoni copët e bananes dhe gjalpën, pritni të zbuten bananet e pastaj shtypini me pirun.
Pasi të ftohet kremi i bananes, përzieni me pavllakën bimore për shllag të cilës i shtoni zhelatinën e shkrirë dhe pas kësaj i përzieni të gjitha me pavllakën e qumështit për shllag.
Pavllakën e qumështit për shllag e hidhni mbi çokollatën e errët të copëtuar dhe e përzieni derisa të zbutet.
Pjesën e poshtme të pandispanjës e lyeni me kremin e bananes dhe mbi krem vendoni copë të bananes mbi të cilat vendosni edhe një shtresë të kremit. Torten e vendosni në frigorifer që të shtrëngohet.
Tërë torten e lyeni me shllag dhe prap e ktheni në frigorifer për ca orë.
Në fund fare, tortën e lyeni me mbështjellësin apo glazurën e çokollatës dhe e zbukuroni sipas dëshirës.